Në raportin “Statistikat e transportit”, INSTAT jep të dhëna edhe lidhur me udhëtimet që kanë bërë shqiptarët në muajin gusht dhe jo vetëm.
Ajo që bie në sy nga këto statistika, është fakti se numri i udhëtimeve, qofshin ajrore, apo detare është rritur ndjeshëm krahasuar me vitin 2016.
FLUTURIMET:
Konkretisht, numri i fluturimeve të kryera në muajin gusht 2017 është 2.640, duke shënuar një rritje me 12,7 % krahasuar me muajin gusht 2016.
Për sa i përket tetëmujorit të 2017-ës, pra nga janari deri më 1 shtator 2017, janë kryer në total 15.876 fluturime, duke u rritur me 11,1 %, krahasuar me të njëjtën periudhë të një viti më parë.
Po ashtu, transporti ajror është më i preferuar për shqiptarët se llojet e tjera, pasi ai zë 59,7 % të transportit gjithsej në tetëmujorin e 2017-ës.
Për rrjedhojë, edhe numri i pasagjerëve që kanë udhëtuar me linja ajrore është rritur me 26.8% në muajin gusht, teksa në këtë periudhë numërohen 328.317 pasagjerë.
Ndërkohë, numri i pasagjerëve që kanë udhëtuar me linja ajrore në tetëmujorin 2017 është 1.741.707, duke u rritur me 24,6 %, krahasuar me të njëjtën periudhë të një viti më parë.
UDHËTIM ME LINJË DETARE:
Numri i pasagjerëve që udhëtojnë me linjë detare në gusht 2017 është 421.256 persona, krahasuar me gusht 2016, ky tregues është rritur 18,7 %.
Në tetëmujorin e 2017, kanë udhëtuar me linjë detare 1.120.320 pasagjerë, duke u rritur me 19,3 %, krahasuar me të njëjtën periudhë të një viti më parë.
