Një inspektori, me detyrë trup shërbimi në Repartin “Shqiponja”, është arrestuar nga Shërbimi për Çështjet e Brendshme dhe Ankesat.
Në pranga ka përfunduar shtetasi Engrid Hënaj, pasi ka shpërdoruar detyrën e tij, duke dekonspiruar veprimet e Policisë.
Në shumë raste, Hënaj jepte informacione mbi veprimet policore kundrejt marrjes së shumave të parave apo favoreve të tjera.
NJOFTIMI I POLICISË:
SHÇBA arreston një inspektor, dekonspironte veprimet e Policisë
SHÇBA ka arrestuar punonjësin e policisë Inspektor Engrid Hënaj, me detyrë trup shërbimi në Repartin “Shqiponja” ne D.P.V. Tiranë.
Ky arrestim u bë i mundur pas një hetimi të përbashkët me Prokurorinë e Rrethit Gjyqësor Kavajë, duke aplikuar metoda speciale të hetimit, për veprën penale të “Shpërdorimit të detyrës” dhe “Përkrahje të autorit të krimit” parashikuar nga nenet 248 dhe 302 i Kodit Penal.
Nga hetimi ka rezultuar se ky punonjës policie në disa raste ka bashkëpunuar me shtetasin F.L., i arrestuar për veprën penale të “Vjedhjes në bashkëpunim me shumë se një herë” parashikuar nga neni 134/2.
SHÇBA ka siguruar prova se kundrejt marrjes së shumave të ndryshme të parave dhe favoreve të tjera, punonjësi i policisë, në shumë raste i jepte informacione mbi veprimet policore që kryheshin, shtetasit të mësipërm dhe personave të tjerë të implikuar ne veprimtari kriminale.
Vazhdojnë hetimet për implikimin e punonjësve të tjerë të Policisë të përfshirë.
