Zyrtarë të Ambasadës Gjermane kanë mohuar rritjen e numrit të azilkërkuesve kosovarë.
Deklarata u bë pas raportimeve në medie se qytetarë të shumtë po udhëtojnë nga Stacioni i Autobusëve në Prishtinë për në Beograd për t’ia mësyrë më pas ilegalisht kufirit me Hungarinë.
Në një prononcim për “Zërin”, Ambasada Gjermane shprehet se Kosova është vend i sigurt, prandaj gjasat për fitimin e azilit nga qytetarët kosovarë janë shumë të rralla.
“Në Gjermani kërkesat për azil nga nënshtetasit e Kosovës faktikisht nuk kanë gjasa për pranim dhe rreth 99 për qind e tyre refuzohen si ‘dukshëm të pabaza’. Përjashtim përbëjnë vetëm raste të rralla, të cilat njihen jo në kuadër të azilkërkimit, por si mbrojtje subsidiare dhe janë raste të ndihmës emergjente humanitare (2010-2017 gjithsej vetëm 56 persona)”, thuhet në përgjigjen e Ambasadës Gjermane.
