SHÇBA dhe IPK inspektojnë patrullat e përbashkëta të Policisë Rrugore Shqipëri – Kosovë
Qytetarët janë të kënaqur me sjelljen e patrullave të përbashkëta të Policive Rrugore Shqipëri-Kosovë.
Në këtë përfundim kanë dalë specialistët e Shërbimit të Çështjeve të Brendshme dhe Ankesave (SHÇBA), të cilët zhvilluan inspektime të përbashkëta me Inspektoriatin Policor të Kosovës.
Inspektimi është përqendruar në akset Rrëshen-Milot, Milot-Lezhë dhe Lezhë-Shëngjin, aty ku janë stacionuar edhe patrullat rrugore të përbashkëta.
Gjatë inspektimit specialistët e SHÇBA-së dhe IPK-së kanë zhvilluar pyetësor me qytetarët dhe drejtuesit e mjeteve në lidhje me sjelljen e policisë së dy vendeve, ku rezultoi se qytetarët janë të kënaqur me sjelljen e patrullave të përbashkëta.
Megjithatë, inspektorët e SHÇBA dhe IPK kanë konstatuar se ka qytetarë të cilët nuk janë të informuar për sa i përket institucioneve ku ata mund të ankohen në rast të sjelljes jo korrekte nga ana e punonjësve të policisë.
Në përfundim të patrullimit të përbashkët të dy Policive Rrugore, SHÇBA dhe IPK do të dalin me një raport të përbashkët ku do të paraqiten rekomandimet dhe vërejtjet për këtë proces.
