Pas sulmeve terroriste në disa qytete të Evropës dhe kërcënimeve të ISIS për sulme të reja, Policia e Shtetit ka shtuar masat e sigurisë në fushën e sigurisë publike, krimit të organizuar, krimet e rënda dhe kufirit.
Kështu, mësohet se do të ketë shtim të prezencës policore me uniformë dhe agjentë në terren, si dhe do të forcohen masat e kontrollit gjatë aktiviteteve me pjesëmarrje masive kulturore-sportive, qendra tregtare, objekte me rëndësi strategjike, trupit diplomatik etj.
Masat e kontrollit do të forcohen edhe në Pikat e Kalimit Kufitar e kufirit të gjelbërt për personat që konsiderohen me risk.
Paralelisht strukturat e Antiterrorit po punojnë intensivisht në terren për mbajtjen nën kontroll të personave me risk, me prirje radikale por edhe lidhjet e tyre.
Këto struktura kanë intensifikuar bashkëpunimin me Prokurorinë, SHISH dhe agjencitë ligjzbatuese të vendeve partnere për shkëmbimin e ndjekjen në kohë të çdo informacioni për veprimtari kriminale me sfond terrorist me qëllim parandalimin, zbulimin e vënien para përgjegjësisë ligjore të autorëve të dyshuar.
