Në shkurtin e këtij viti, një magji masive e organizuar në mediat sociale, dhe ekzekutuar nga shtrigat në SHBA dhe në mbarë botën, u bë virale. Synimi? POTUS # 45, Donald J. Trump.
Disa anëtarë të bashkësisë pagane e përqafuan me entuziazëm këtë ide,dhe filluan të punonin me padurim. Të tjerë mendonin se kishte alternativa më të mira.
Një pjesë e mire e njerëzve u shqetësuan nga kjo ide, duke përmendur “rregullin e treshit”,dhe arsye të tjera se pse ata mendonin se në fakt në botë nuk ka shtriga të vërteta.
Përkundrazi, të tilla ka pasur. Dhe ato kanë vepruar në momente të ndryshme historike. Ekziston një precedent historik në përdorimin e magjisë me shënjestër një figurë politike.
Në vitin 1940, një grup magjistaresh britanike u mblodhën për të organizuar Operacionin “Koni i Pushtetit”, duke synuar askënd tjetër përveçse udhëheqësit nazist, Adolf Hitler.
Tradicionalisht, Koni i Pushtetit, është një metodë e rritjes dhe drejtimit të energjisë nga një grup njerëzish. Ata që janë të përfshirë në këtë ritual, formojnë një rreth për të formuar bazën e konit, dhe mund të lidhen fizikisht me njëri-tjetrin duke u mbajtur nga duart apo thjesht mund të përfytyrojnë energjinë që rrjedh midis anëtarëve të grupit.
Teksa energjia ngrihet – qoftë duke kënduar, kërcyer apo metodave të tjera – një kon do të formohet mbi grupin, dhe në fund ai mbërrin kulmin më lart.
Sapo koni formohet plotësisht, kjo energji pastaj dërgohet në univers, e drejtuar për çfarëdo qëllimi magjik mbi të cilin po punohet.
Në vitin1940, Hitleri e kishte rritur dukshëm forcën ushtarake të Gjermanisë, e cila kishte qenë e reduktuar pas Traktatit të Versajës në fund të Luftës së Parë Botërore.
Në fillim të majit të atij viti, ushtria gjermane pushtoi Holandën dhe filloi të përparonte, duke depërtuar në drejtim të perëndimit.
Pas një sërë sulmesh aleate të dështuara, gjermanët arritën në bregdet, duke i ndarë forcat aleate në dy pjesë, me ushtrinë franceze në jug, dhe forcat e ekspeditës britanike dhe trupat belge në veri.
Sapo mbërritën buzën Kanalit Anglez, gjermanët filluan të lëviznin drejt veriut, duke rrezikuar pushtimin e porteve franceze.
Sikur kjo të mos mjaftonte kjo, trupat britanike dhe ato belge, së bashku me disa njësi franceze, mund të kapeshin në rast se nuk do t’i shpëtonin ndjekjes së forcave gjermane.
Në 24 maj, Hitleri nxori një urdhër për ndalimin e përparimit të trupave gjermane – dhe arsyeja e vendimi debatohet ende sot nga historianë dhe studiues. Cilido qoftë motivi, kjo ndalesë shkurtër e lejoi Marinën Mbretërore Britanike të evakuonte trupat britanike dhe aleatët e tjerë. Rreth 325.000 njerëz u shpëtuan nga Dunkirku përpara se të mund t’i kapeshin nga nazistët.
Trupat aleate ishin të sigurta nga Vermahti, por në horizont lindi një problem tjetër. Kryeministri i ri britanik Winston Churchill, dhe shumë anëtarë të parlamentit ishin të shqetësuar se Anglia mund të pushtohej nga gjermanët.
Pyjet e Reja të Britanisë së Madhe, shtrihen në bregun jugor të ishullit, jo shumë larg qyteteve portuale të Sauthemptonit dhe Portsmuthit.
Ndonëse asnjëra prej tyre nuk qe pika më e afërt me bregdetin francez, ishte krejtësisht e mundur që çdo pushtim gjerman nga Evropa të mund të mbërrinte shumë shpejt edhe aty.
Kjo do të thoshte,që njerëzit që jetonin përgjatë bregdetit jugor të Britanisë, kishin interes të mbronin vetveten me mjete të zakonshme apo edhe ritualet e magjisë.
Në fundin e viteve 1930, një nëpunës civil britanik me emrin Gerald Gardner, u rikthye në shtëpinë e tij pas shumë vitesh udhëtimi jashtë vendit.
Gardner, i cili më vonë do të bëhej themeluesi i Shtrigërisë moderne, u bashkua me një grup shtrigash në Pyllin e Ri.
Sipas legjendës, në Lammas Eve, në 1 gusht 1940, Gardner dhe disa shtriga u mblodhën në afërsi të qytetit Highcliffepër të hedhur një magji mbi Hitlerin,dhe mbajtur larg ushtrinë gjermane nga pushtimi i Britanisë.
Rituali që u zhvillua atë natë, u bë i njohur si Operacioni Koni i Pushtetit. Ekziston shumë pak informacion rreth asaj se çfarë përfshinte rituali, por disa historian kanë bërë bashkë disa pjesë të ngjarjes.
Studiuesi Philip Heselton thotë: “Shtrigat formuan një rreth, dhe filluan magjinë e tyre. Në vend të një zjarri tradicional – ndoshta për shkak të frikës së dallimit nga avionët armiq–u përdor një elektrik dore, në drejtim të Berlinit, si një fokus për sulmet e tyre magjike”.
Më pas, gratë tërësisht të zhveshura,filluan të vallëzojnë sipas një modeli spiral rreth rrethit, duke ndërtuar një gjendje të përbashkët ekstaze, që ato besonin se mund të kontrollonte forcat magjike.
Ato u kapën për duar dhe me njëra-tjetrën, ngritën konin e madh të pushtetit dhe e drejtuan mendimin tek truri i Hitlerit: “Ti nuk mund ta kalosh detin!”, “Ti nuk mund ta kalosh detin!”, “Ti nuk je në gjendje ta bësh këtë!”.
Interesat është fakti se stërgjyshërit e tyre, kishin bërë të njëjtën gjë kundër Armadës së pathyeshme Spanjolle me fjalët: “Vazhdoni, ikni”, “Vazhdoni, ikni”, “Ju nuk mund të zbarkoni dot në tokë tonë!”. Gardner thotë se nuk beson se ai ritual magjik e ndaloi Hitlerin. “Gjithçka që mund të them, është se pashë një ceremoni shumë interesante, dhe që u përsërit disa herë më vonë; dhe ndonëse të gjitha mjetet e pushtimit ishin gatshme, fakt është se Hitleri nuk u përpoq kurrë të pushtonte Anglinë në rrugë tokësore”.
Gardner më vonë e përshkroi ritualin në detaje, duke pretenduar se vallëzimi dhe këndimi i tërbuar, solli pasoja të rënda për shumë nga pjesëmarrëset.
Madje disa prej grave, vdiqën nga rraskapitja gjatë ditëve që pasuan. Edhe pse Gardner dhe kolegët tij krijues të magjisë nuk e zbuluan kurrë vendndodhjen e ritualit, disa autorë janë munduar të gjejnë vetë atë, duke hamendësuar disa vende konkrete.
Gjithsesi, konsensusi i përgjithshëm, është se 17 apo më shumë shtriga u mblodhën vërtet atë natë për t’i bërë magji Hitlerit, me qëllimin përfundimtar mbajtjen e tij jashtë Britanisë.
Përshtati për Tirana Today, Alket Goce
