Kredia për biznesin ka prekur nivelet më të ulëta të gjashtë viteve të fundit. Tkurrja e portofolit të huasë së sipërmarrjeve private ka vijuar edhe në gjysmën e parë të këtij viti, ndërkohë që në fund të qershorit, sasia e huasë bankare në përdorim të biznesit ishte 333 miliardë lekë.
Sipas të dhënave nga Banka e Shqipërisë, që nga fillimi i vitit vlera e portofolit ka rënë me 10 miliardë lekë të tjera. Kredia për biznesin ka aktualisht vlerën më të ulët që nga mesi i vitit 2011. Por përveç kësaj ky portofol në dy vitet e fundit është tkurrur mjaft edhe nga procesi masiv i fshirjes së kredive të humbura. Në dy vjet, bankat kanë nxjerrë jashtë bilancit afro 300 milionë euro kredi të humbura, shumica e të cilave i takojnë sipërmarrjeve.
Problematika e gjatë e kredive me probleme është bërë edhe një faktor madhor frenues në kreditimin e biznesit. Bankat janë shumë konservatore në kreditimin e biznesit, sidomos të biznesit të madh. Kriza ka goditur ndjeshëm edhe kërkesën, dështimi i disa kompanive të rëndësishme, i ka hequr sistemit bankar klientë të mëdhenj dhe strategjikë, shkruan SCAN.
Nisma investuese e biznesit ngelet e zbehtë; ashtu si edhe gatishmëria e bankave për të marrë përsipër rreziqe të mëdha është kuptueshëm e ulët. Zgjedhjet e përgjithshme dhe tensionet politike në muajt para tyre kanë qenë një tjetër faktor i përkohshëm që nuk ka favorizuar rritjen e kreditimit në gjysmën e parë të këtij viti.
