Pedofilia gjithmonë e më shumë është e prirur që kontaktet e para t’i vendosi në bashkëbisedimet online duke qenë se ky është një terren i frekuentuar gjerësisht nga të miturit.
Specialisti për Krimin Kompjuterik në Policinë e Shtetit, Artan Dashi në një intervistë tregon se në vendin tonë kanë nisur që pedofilët të veprojnë edhe online.
Ai deklaron se vazhdimisht ka denoncime për adresa të dyshimta.
“Po, ka pedofil online në Shqipëri. Ka pasur dhe ndalime në 2014- 2015 kur janë ndaluar dy pedofilë, por këto nuk kanë qenë rastet e vetme që janë identifikuar nga ana jonë. Në bashkëpunim me Interpol dhe Europol na vijnë vazhdimisht linqe dhe adresa, IP, apo adresa të emaileve të personave të caktuar për të cilët ne bëjmë verifikimet tona” është shprehur ai për “Ora News“.
Dy vjet më parë u ndaluan dy persona të cilët bënin pedofili online. Në kompjuterin e njërit prej tyre u gjetën 290 gigabajt materiale pornografike, ndërsa personi tjetër kërkohej nga pala italiane për pedofili në shtetin italian.
Po ashtu ai shprehet se janë shumë të pakta rastet kur pedofilët arrijnë të takohen me të miturinnë vendin tonë, ndërsa në vendet e tjera janë më të shumta. Në 4- 5 raste që janë bërë sondazhe vetëm njëri ka dashur të dalë në takim.
Apeli i parë shkon për prindërit të tregohen të kujdesshëm me teknologjinë e komunikimit që i lënë fëmijëve të tyre në dorë.
