Në Britani janë përplasur dy trena dhe si pasojë kanë mbetur të plagosur tre persona. Përplasja ka ndodhur mes një treni pasagjerësh dhe një treni mallrash, në stacionin Waterloo të Londrës.
Ngjarja ka ndodhur sot rreth orës 05:45. Daily Mail raporton se tre persona u kontrolluan nga Shërbimi i Ambulancave të Londrës por asnjeri nuk pati nevojë të shkonte në spital. Shërbimet e emergjencës, policia, mjekët dhe zjarrfikësit kanë shkuar në vendin e ngjarjes.
“South West Train” tha se do ta kufizonte shërbimin në këtë stacion për pjesën tjetër të ditës. Shumica e trenave që qarkullojnë janë ndaluar të lëvizin, të dalin nga stacioni dhe është paralajmëruar se stacionet e tjera në zonë do të jenë shumë të ngarkuar.
Ky është një nga stacionet më të ngarkuar në Britaninë e Madhe, ku lëvizin mesatarisht 270 mijë udhëtarë në ditë.
