Nga Qafë-Thana drejtori i Përgjithshëm i Policisë së Shtetit Haki Çako iu është drejtuar të gjithë atyre që kërkojnë azil në vendet e Bashkimit Evropian për një jetë më të mirë të mos e ndërmarrin këtë hap pasi shanset për ta përfituar atë janë zero.
Këtë konstatim Çako e bëri mesditën e sotme në inspektimin e Pikës së Kalimit Kufitar në Qafë -Thanë, për të parë nga afër zbatimin e masave për sezonin turistik dhe masat e shtuara për parandalimin e azilkërkimit.
Gjatë inspektimit Drejtori i Policisë së Shtetit Çako1 u takua me Drejtorin për Kufirin e Rajonit të Ohrit Xhelal Lata. Ndërsa theksoi se të gjithë ata që kërkojnë azil në vendet e Bashkimit Evropian do të penalizohen.
“Jemi këtu dhe për një aspekt i cili është bërë tashmë shqetësim lidhur me lëvizjen e disa shtetasve shqiptarë me qëllim dhe kërkesë për azilkërkim në vendet e BE, të cilët deri diku janë shndërruar në një farë problemi për shtetin shqiptar por edhe për vetë ata, duke mos e kuptuar dhe mos e konceptuar qartë se integrimi i vendeve tona bëhet me rregulla, bëhet me norma dhe jo në mënyrë klandestine ose dhe duke shkelur parimet bazë të integrimit të BE. Në këtë aspekt them që së bashku do vazhdojmë kontributet për t’ju bërë të qartë atyre se azilkërkimi është një fenomen i cili nuk ekziston, e drejta për të përfituar në këtë mënyrë është zero dhe do të vazhdojë të jetë zero”, u shpreh Çako.
