Rreth orës 15:30, në aeroportin e Rinasit, ka mbërritur një charter me 30 shtetas shqiptarë të rikthyer nga Franca, të cilët kishin kërkuar azil politik në Francë. Ky është avioni i tretë, një tjetër do ketë brenda pak ditësh çka dëshmon se bashkëpunimi me Francën për kthimin e tyre është në një fazë të re.
Zëvendësministrja e Punëve të Brendshme Rovena Voda, e shoqëruar nga Drejtoresha e Departamentit për Kufirin dhe Migracionin në Policinë e Shtetit, Aida Hajna, theksoi se të gjithë ata shtetas që tentojnë të udhëtojnë drejt Francës apo vende të tjera të BE-së, me qëllim kërkimin e azilit politik, nuk do të mund ta përfitojnë një gjë të tillë.
“Jemi përsëri në Rinas, këtu në një operacion tjetër të riatdhesimit të azilkërkuesve shqiptarë të kthyer nga shteti francez nëpërmjet një charteri. Jemi këtu për të dhënë një mesazh të gjithë qytetarëve të Republikës së Shqipërisë, për t’u thënë se shanset për azil në vendet e BE janë zero. Tashmë prej 3 vitesh Shqipëria është në listën e vendeve të origjinës së sigurt, pra një vend i sigurt ku qytetarët e tij, shanset, e theksoj dhe një herë për të kërkuar azil, janë zero”, u shpreh Voda.
Ajo shtoi se urdhri i ri i policisë së shtetit nuk cenon lëvizjen e lirë të qytetarëve, por vetëm rrit kontrollin kufitar konform rregullave të zonës Schengen.
