Kryetari i Partisë Socialiste Edi Rama dhe njëherësh kryeministri i dalë nga zgjedhjet e fundit parlamentare ka filluar të diskutojë mbi kabinetin e ri qeveritar dhe 4 vitet e ardhshme të qeverisjes.
Për këtë arsye, më 25 gusht, Rama pritet të mbledhë Asamblenë e Partisë Socialiste, ku do të diskutohen emrat e rinj që do të jenë në funksionet drejtuese qeverisëse.
Sipas burimeve nga selia e Partisë Socialiste, data nuk është zyrtarizuar ende, por Asambleja mblidhet për të piketuar emrat që do të jenë në poste drejtuese dhe njëherësh për të analizuar zgjedhjet e fundit parlamentare.
Në këtë drejtim, 5 grupet e punës të ngritura nga Rama pak ditë më parë po i mbyllin raportet e tyre për t’ia dorëzuar ato kryeministrit. Raportet lidhen kryesisht me më mënyrën e funksionimit të administratës dhe pastrimit të saj nga të punësuarit përmes nepotizmit apo që janë evidentuar si të korruptuar, ku aktualisht janë tri institucionet mbi të cilat ka nisur reformat, hipotekat, spitalet dhe tatimet.
Po nga Asambleja pritet të dalin emrat për kreun e ri të Kuvendit, që luhaten midis Gramoz Ruçit dhe Taulant Ballës. Ndërsa qeveria do të ketë ministri me një numër të kufizuar, ashtu siç e deklaroi vetë kryeministri Rama pak ditë më parë, që sipas tij, synon të sjellë efektivitet përmes një qeverie të vogël dhe produktive.
