Janë publikuar pamjet e atentatit që ndodhur mbrëmjen e djeshme te “Komuna e Parisit”, ndaj 24-vjeçarit Lorenc Hoxha.
Ora News ka siguruar një video amatore, e publikuar nga dëshmitarë të ngjarjes, ku shfaqen pamjet e momentit të atentatit, teksa makinat kishin ndaluar me semafor të kuq.
Siç duket në video, nga një makinë e zezë, tip fuoristradë, zbresin dy të rinj, njëri i veshur me të bardhë dhe pantallona të shkurtra (xhinse), ndërsa personi tjetër është i veshur me pantallona të zeza dhe të gjata.
Pasi dalin nga makina, ata i afrohen një makine tjetër, brenda së cilës ishte objektivi dhe e kanë qëlluar atë me armë. Më pas makina e zezë merr rrugën për “Sulejman Delvina”.
Videoja mban datën 3 gusht 2017, dhe në ekran është shënuar ora 19: 51 minuta.
Ajo që të bën përshtypje në këtë video, është fakti se personi që ka filmuar ngjarjen, pas largimit të autorëve, i ka ndjekur këta të fundit.
Madje shoferi shihet teksa përplas edhe një qen, pasi po ecte me shpejtësi duke ndjekur atentatorët.
Këta të fundit e ndalojnë automjetin e tyre, ndërsa shoferi që ishte duke e ndjekur, pasi e kalon, merr kthesën në mes të rrugës.
Nuk dihet se çfarë ka ndodhur më pas me atentatorët, por mësohet se videoja është dorëzuar në polici për të ndihmuar në zbardhjen dhe kapjen e autorëve të krimit./ Tirana Today
