Shkrimtari Ismail Kadare ka dhënë sot një intervistë, ku ka sqaruar letrën e tij të dërguar Enver Hoxhës në vitin 1980, të publikuar para pak ditësh.
Kadare shprehet se zgjodhi të pranonte “fajin” e të motrës para diktatorit, pasi ishte gabimi i saj që kishte folur kundër Enver Hoxhës duke marrë parasysh rrezikun që mund të sillte.
Në këtë intervistë, Kadare e pranon që ai është mbrojtur nga vetë diktatori Enver Hoxha.
“A ka një mbrojtje këtu? Ka një mbrojtje. Thashethemi është se e mbronte Enver Hoxha. Edhe unë po ju them po, ashtu është. Vetëm ai kishte fuqi të të mbronte nga akuza të tilla”, pranon shkrimtari, ndërsa më tej tregon edhe arsyen se përse mbrohej nga diktatori.
Enver Hoxha e mbronte atë nga sistemi i tij, por edhe nga vetvetja, gjë që Kadare shpjegon se ndodh për faktin se ai ishte shkrimtar i njohur:
“Ai më mbronte nga njerëzit e vet, nga sistemi i vet, nga vetja e vet. Kjo ndodh shpesh me shkrimtarët e njohur. Raportet e tyre me rendet tiranike janë zakonisht të rënda e të ndërlikuara, kështu shpjegohet, ndoshta edhe arsyeja që takimet e tyre me diktatoret janë aq të rralla. Janë shkrimtarët, ndoshta, që i shmangnin, por tiranët bënin të njëjtën gjë. Këmbimet e letrave ose bisedat telefonike janë gjithashtu të rralla. Interpretimet e tyre të vështira dhe shpjegimet kundërthënëse për to vazhdojnë shpesh me vite, si e famshmja bisedë telefonike Stalin-Pasternak. Kur i tregova një mikut tim shqetësimin që do t’i drejtoja një letër Enver Hoxhës, ai u habit që kjo ndodhte për herë të parë. Iu duk jonormale një gjë e tillë, në kuptimin jo të mirë të fjalës”, shpjegon Kadare.
