Tashmë të gjithë të sapodiplomuarit do të kenë mundësi praktike në institucionet e qeverisjes qendrore, ato vendore dhe disa kompani publike e private.
Njoftimi është dhënë nga ministria e Financave, sipas së cilës numri i vendeve të disponueshme për praktikë është 1343.
Aplikimi për çdo të interesuar mund të bëhet online, përmes faqes së vënë në dispozicion për praktikat dhe profilet ku mund të aplikohet janë gjithëpërfshirëse.
Por, cilat institucione ofrojnë praktikë?
Vetëm Kryeministria ka lënë si opsion 20 vende për praktikantët që mund të kenë profil studimor si juridik, ekonomik, inxhinieri, shkenca politike.
Institucione të tjera në varësi direkte të Kryeministrisë kanë hapur gjithashtu mundësi për praktikë, si INSTAT që kërkon 19 praktikantë, ASIG 2 dhe drejtoritë rajonale të arkivës me një total prej 26 studentësh.
Totali i institucioneve që ofrojnë mundësinë e praktikës sipas të dhënave të gjeneruara nga platforma është 19 për ato qendrore, 93 institucione varësie, 19 njësi të qeverisjes vendore dhe 10 shoqëri tregtare. Vetëm OSHEE kërkon 29 praktikante me profil ekonomik.
Të drejtën e aplikimit në programin kombëtar të praktikave të punës e kanë të gjithë ata që kanë përfunduar studime të ciklit të parë (bachelor) dhe janë duke studiuar apo kanë përfunduar studime të ciklit të dytë në një nga profilet studimore të lart përmendura në përshkrimin e bërë nga secili institucion.
Programi parashikohet që të zgjasë tre muaj, ndërsa platforma është ende në rifreskim të dhënave dhe në ditët në vijim pritet që numri i vendeve të lira për praktikë të rritet ndërkohë që listës mund t’i shtohen institucione të reja.
