Christian Panucci mbërriti në orët e vona të së martës në Shqipëri, ndërsa pritet që sot në orën 11:00 FSHF ta zyrtarizojë atë si trajnerin e ri të Kombëtares Shqiptare.
Presidenti i FSHF-së, Armand Duka do të mbajë një konferencë, ku do të prezantojë pasuesin e De Biasit, pas dorëheqjes së këtij të fundit.
44-vjeçari italian ka udhëtuar 9600 milje, nga Miami në Romë dhe nga Roma në Tiranë, për të qenë i pranishëm në konferencën për shtyp, ku do të bëhet edhe prezantimi zyrtar, të cilit nuk ka dashur t’i zbulojë asgjë paraprakisht. Prononcimi i parë i Panuccit ka qenë i shkurtër mbrëmë teksa mbërriti në aeroportin “Nënë Tereza”, ku tha:
“Po, jam i lumtur, por do të shihemi nesër. Për çdo gjë do të flasim nesër”, u shpreh ai për mikrofonin e Top Channel.
Panucci ka qenë asistent i Fabio Capellos te kombëtarja ruse, ndërsa ka drejtuar për pak kohë si trajner dhe Livornon e Ternanen.
