Astrit Patozi ka vijuar takimet me demokratët e zhgënjyer në Durrës dhe në Vlorë. Gjatë fjalës së tij, Patozi hodhi poshtë etiketimet si “kundërshtar i Bashës”, teksa u shpreh se kundërshtari i tij i vetëm është Partia Socialiste dhe Edi Rama.
Jo vetëm kaq, por Patozi u shpreh se Basha është njëri prej nesh dhe se është i gatshëm të bashkëpunojë me të për të forcuar Partinë Demokratike.
“Këto takime po tregojnë se PD është e fortë dhe nuk e pranon të konsiderohet si një biznes privat. Partia Demokratike është pronë e demokratëve, e atyre që kanë dhënë gjakun, djersën dhe gjithçka tjetër që nga 1991 deri sot, dhe nuk mund të jetë kurrë pronë e një njeriu.
Gjatë këtyre ditëve ne jemi etiketuar si kundërshtarët e Lulzim Bashës. E them me shumë bindje ne nuk jemi kundërshtarët e Lulzim Bashës, por të Edi Ramës dhe Partisë Socialiste.
Lulzim Basha pavarësisht rezultatit shumë të ulët në zgjedhje është njëri prej nesh.
Ne jemi të gatshëm të punojmë edhe me Lulzim Bashën edhe me këdo që është në krahun e tij pasi ne duam një Parti Demokratike të bashkuar edhe më të fortë, ky është qëllimi ynë.
Më tej, deputeti i bëri thirrje Bashës që ta ndërpresë këtë “farsë elektorale” dhe Selamit që të largohet nga kjo garë dhe të mos bëhet patericë për legjitimimin e një fitoreje të vjedhur të kreut të PD-së.
“Lulzim Basha po vrapon që të rrëmbejë ngjitur karrigen e kryetarit kurse neve na intereson Partia Demokratike.
I bëj thirrje Lulzim Bashës, ka ende pak kohë, që ti thërrasë arsyes ta ndërpresë farsën elektorale, ti japë mundësinë demokratëve që ta zgjedhin ata alternativën më të mirë dhe jo ta paracaktojë ai rezultatin pa rregulla loje, ia ka borxh Partisë Demokratike.
E ftoj Eduard Selamin ,se në rast nuk do të hyjë në historinë e politikës shqiptare si një patericë e shëmtuar i cili shërbeu për të legjitimuar një fitorë të vjedhur të kryetarit të PD-së, duhet të largohet nga kjo garë.
Thirrjen kryesore e kam për demokratët e Shqipërisë. Kjo garë të ndërpritet dhe PD të rihapë garën. Është mënyra e vetme që ta ringrejmë këtë parti dhe të mposhtim në përplasjen e parë kundërshtarin politik Edi Rama dhe Partinë Socialiste”, përmbylli Patozi.
