Arsim Aziri është një punonjës policie në Prishtinë, i cili zgjodhi Durrësin për kaluar pushimet me familjen e tij. Por, kur ka mbërritur në qytetin bregdetar, ai ka hasur në një “surprizë”, e cila e ka bërë të ndërrojë mendje.
Autobusi me të cilin mbërriti Arsimi me bashkëshorten dhe tre fëmijët e mitur, nuk u lejua të hyjë në rrugën “Pavarësia”.
“U keqtrajtuam nga shteti nënë, u keqtrajtuam ne që vijmë dhe bëjmë pushime këtu. Përveç kosovarëve, asnjë pushues tjetër nuk është penguar të hyjë në plazh. Vitin tjetër do të shkojmë në Ulqin, nuk do të vijmë më në Durrës, pas kësaj që na bënë këtë vit. Policia e Shqipërisë nuk ka solli asnjë pengesë nga kufiri deri në Durrës, por këtu tek Ura e Dajlanit nuk na lejuan të hynim. Na dërguan në Plepa, edhe atje nuk na lejuan të hynim në plazh. Me fëmijë të vegjël, me çanta e me valixhe, na bëjnë këtë keqtrajtim”, thotë Arsimi.
Punonjësi i policisë shprehet se si rezultat i kësaj gjendjeje, plazhi në Durrës është bosh, ndërsa shton se vitin tjetër do të shkojë në Ulqin për të kaluar pushimet.
