Gjiganti evropian i prodhimit të avionëve, “Airbus” nënshkroi një marrëveshje kuadër me kompaninë “China Aviation Supplies Holding Company” (CAS) që parashikon shitjen e 140 avionëve me një vlerë totale prej 22,8 miliardë dollarë (20,12 miliardë euro) njoftoi pronari “Airbus”, Tom Enders në Berlin.
Porosia, që përkon me 100 avionë të distancave mesatare A320 dhe 40 të distancave të gjata A350 XWB, është një prej kontratave më të mëdha të nënshkruara prej shumë vitesh nga Airbus”, deklaroi Enders gjatë një konference për shtyp në Berlin, ku presidenti kinez Xi Jinping ndodhet për vizitë, shkruan ATA.
Afatet e dorëzimit të këtyre avionëve ende janë në fazë diskutimi, por pritet të bëhen në pesë ose gjashtë vitet e ardhshme, theksoi drejtori i përgjithshëm i Airbus.
