Fushata elektorale e këtij viti është karakterizuar nga mungesa e posterave dhe flamujve të subjekteve politike, gjë që u vendos në marrëveshjen mes forcave politike që përcakton se fushata do të zhvillohet pa banderola, banera apo flamuj.
Kështu, subjektet politike janë çliruar edhe nga një barrë shumë e madhe shpenzimesh të konsiderueshme.
Por sa i kanë ulur shpenzimet partitë politike nga një vendim i tillë?
Në zgjedhjet parlamentare të vitit 2013, Partia Socialiste shpenzoi sipas raportit të auditimit, 15 milionë e 452 mijë lekë në flamuj, aksesorë dhe banera. Edhe shpenzimet e Partisë Demokratike për këto materiale propagandistike shkojnë në një shifër të konsiderueshme prej 14 milionë e 136 mijë lekësh, nga ku 536 mijë lekë kanë qenë shpenzimet vetëm për adeziv (ngjitës).
Duke iu referuar raporteve të auditimit për shpenzimet në zgjedhjet e kaluara, SCAN ka përllogaritur se vetëm PS dhe PD do të kursejnë nga kjo pikë e marrëveshjes rreth 29 milionë lekë, ndërsa partitë e tjera si LSI dhe PDIU kanë një kursim më minimal.
Të shprehura në përqindje, PD shkurton 17,7% të shpenzimeve, PS shkurton 13,6%.
| Subjekti | Shpenzime totale për zgjedhjet 2015 | Shpenzime për materiale zgjedhore | Kursimi (pa flamuj, postera dhe banderola) |
| Partia Socialiste | 109,699,658 | 33,884,062 | 15,000,000 |
| Partia Demokratike | 78,799,618 | 22,900,000* | 14,000,000* |
| Lëvizja Socialiste për Integrim | 62,187,424 | 7,248,000 | 1,326,000 |
| Partia Drejtësi, Integrim dhe Unitet | 9,039,789 | 3,538,547 | 392,000 |
*shpenzimet e detajuara për PD janë përllogaritur në bazë të raportit të auditimit dhe historikut të shpenzimeve në zgjedhjet e 2013 e 2015
