ISIS ka marrë përgjegjësinë e sulmeve të së shtunës në Londër, referuar agjencisë së tyre të lajmeve (propagandës) “Amaq News Agency”.
ISIS e ka marrë shpesh përgjegjësinë lidhur me shumë sulme të ndodhura në vende të ndryshme të botës. Organizata terroriste ka marrë gjithashtu përgjegjësinë edhe për sulmin në Filipine edhe pse autoritetet atje e mohojnë që ky sulm të jetë shkaktuar nga terroristët. Ashtu si edhe këtë herë deklarata e “Amaq News Agency” nuk ka asnjë të dhënë, se pas këtyre sulmeve në Londër fshihet vërtet ISIS, shkruan “The Sun”.
Ngjarja
Të shtunën pas mesnate, të paktën gjashtë persona humbën jetën dhe 48 të tjerë u plagosën pas një atentati të dyfishtë në urën e Londrës, kur një furgon, që ecte me shpejtësi të madhe përplasi këmbësorët në “London Bridge”, vend i cili është më i frekuentuar për turistët në kryeqytetin britanik.
Mediat lokale raportuan se përveç incidentit me furgonit, në kryeqytetin britanik ndodhën edhe dy sulme tjera, njëri në “Borough Market” ku ka pasur të shtëna me armë, tjetri në zonën Vauxhaul ku persona të paidentifikuar kanë goditur me thikë kalimtarët.
Ndërkohë, policia tha se i kishte vrarë të tre terroristët e dyshuar, në aksin mes “London Bridge” dhe “Borough Market.”
Autoritetet britanike ende nuk kanë dalë me informacione të detajuara, ndërsa ISIS thuhet se ka marrë përgjegjësinë e këtyre sulmeve.
(TIRANA TODAY)
