Tani është radha e trashëgimtarëve që të marrin këstin e dytë. Kjo vjen pas ndarjes së këstit të tetë për të dënuarit që janë gjallë. Ministria e Financave ka publikuar emrat e 70 ish-të përndjekurve, dosjet e të cilëve janë gati për këst të dytë. Por paraprakisht duhet që familjarët e tyre të paraqesin në sektorin e pagave dhe dëmshpërblimeve dokumentacionin e nevojshëm, përkatësisht: kopje të letërnjoftimit, numër llogarie, certifikatë vdekjeje, certifikatë të trungut familjar, dëshmi trashëgimie dhe prokurë.
Në rastin kur aplikimet për dëmshpërblim janë bërë në mënyrë individuale nga secili prej trashëgimtarëve, dosja konsiderohet gati për pagesë atëherë kur secili prej tyre ka bërë dorëzimin e dokumentacionit. Është pikërisht kjo një ndër arsyet, krahas pamjaftueshmërisë së fondit, që ka sjellë vonesa në ndarjen e kësteve për këtë kategori.
Pra, fakti që jo të gjithë përfituesit e radhës së parë dhe të dytë kanë përmbushur detyrimin ligjor për depozitimin e dokumenteve të nevojshme për alokimin e çdo pagese. Kujtojmë që edhe këtë vit, për trashëgimtarët është adresuar vetëm 30% e fondit vjetor, çka do të thotë se në arkë janë vetëm 6 milionë dollarë. Nëse deri në fund të muajit korrik nuk do të jetë bërë plotësimi i dosjeve nga ana e familjarëve që kanë emrin në listë, janë 3 muaj afat për dorëzimin e dokumenteve, atëherë me fondin e këtij viti do të nisë ndarja e këstit të tretë.
