Çelja e fushatës së Partisë Demokratike është shoqëruar me një incident, pasi të paktën 50 persona janë paraqitur në QSUT pas mitingut.
Qytetarët e paraqitur në spital kanë pasur shenja të djegies dhe skuqjes së syve, nga shkaqe ende të pazbuluara.
Mes personave të lënduar, është edhe kreu i PD-së, Lulzim Basha i cili është paraqitur në spital në orët e para të mëngjesit. Mësohet se kryedemokrati ka qëndruar mbrëmë në spital për të marrë trajtimin e duhur mjekësor, ndërsa mëngjesin e sotëm është kthyer në shtëpi.
Për shkak të këtij incidenti, janë anuluar edhe një sërë takimesh që kreu i PD kishte parashikuar paraditen e sotme në disa qytete të vendit. Kështu, Basha do të takohej sot në Divjakë me qytetarë në orën 10.00, më pas në orën 11.00 do të ishte në Lushnjë dhe në 12.30 në Roskovec. Por, këto takime u anuluan në një njoftim të dytë të Partisë Demokratike.
Aktualisht po kryhen ekzaminime për të zbuluar shkaqet që provokuan simptomat te qytetarët, ndërsa policia ka bllokuar bulevardin “Dëshmorët e Kombit”.
Mësohet se tashmë vetëm 3 persona ndodhen nën vëzhgimin e mjekëve në spital, ndërsa të tjerët pas marrjes së mjekimit janë larguar në shtëpitë e tyre.
Më poshtë njoftimi zyrtar i policisë lidhur me ngjarjen:
Në datë 28.05.2017, rreth ores 04.00 te mengjesit në Q.S.U.T., jane paraqitur per ndihme mjekesore rreth 50 shtetas me simptoma te ngjashme, kryesisht djegie ne sy dhe skuqje lekure ne pjeset e siperme te trupit.
Nga verifikimet paraprake rezulton se keta shtetas kanë qenë pjesemarrës në aktivitetin e zhvilluar nga Partia Demokratike, mbajtur ne oren 19:00 te dates 27 maj, zhvilluar ne Bulevardin ‘Deshmoret e Kombit’ ne Tirane.
Pasi jane mjekuar te gjithe shtetasit jane larguar per ne banese, veç 3 prej tyre qe kane patur me teper shqetesime dhe po mbahen nen kujdesin e mjekeve ne spital.
Menjehere sapo ka marre njoftim, nen drejtimin e Prokurorise se Tiranes eshte ngritur grupi hetimor me eksperte nga Policia e Shtetit, Garda e Republikes, struktura te specializuara te Forcave te Armatosura etj.
Nderkohe po kryhen gjithe egzaminimet e nevojshme per te percaktuar shkakun qe provokoi simptomat si dhe zbardhjen e plote te rrethanave te ngjarjes.
