Takimi i radhës midis kryeministrit Edi Rama dhe kreut të Partisë Demokratike, Lulzim Basha zyrtarizoi edhe emrat që do të jenë pjesë e qeverisë teknike.
Ministrat vijnë nga formime të ndryshme që nga doktorë, juristë dhe kolonelë. Kabineti fillon me zëvendëskryeministren Ledina Mandia, ministrin e Brendshëm, Dritan Demiraj; ministren e Financave, Helda Vukaj; ministrin e Drejtësisë, Gazmend Bardhi; ministren e Arsimit Mirela Karabino; ministrin e Shëndetësisë, Arben Beqiraj dhe ministren e Mirëqenies Sociale, Xhulieta Kërtusha.
Zëvendëskryeministrja Ledina Mandia, ka mbajtur më parë postin e ish-Avokates së Shtetit dhe njihet nga publiku edhe si dëshmitare e thirrur nga komisioni hetimor për çështjen CEZ-DIA.
Historia e ministrit të ri të Brendshëm, Dritan Demiraj me ministren e Mbrojtjes Mimi Kodheli
Historia më interesante është ajo e ministrit të ri të Brendshëm Dritan Demiraj, i cili mban dekoratën presidenciale “Nderi i Kombit”, por kjo nuk mjaftonte për ministren e Mbrojtjes, Mimi Kodheli. Demiraj u lirua nga FA me firmën e ministres Kodheli për shkak se ishte “larguar pa leje jashtë shtetit”. Ai u largua nga puna në 18 dhjetor 2014, 3 vite më parë, pas 31 vitesh kontribut në Forcat e Armatosura të Republikës së Shqipërisë pas një konflikti që pati me ministren e Mbrojtjes, Mimi Kodheli. Tani Demiraj e Kodheli do të ulen përballë njëri-tjetrit si kolegë në kabinetin qeveritar edhe pse prej vitesh kanë shkëmbyer akuza të ashpra në publik.
Eksperti i PD-së për reformën në gjyqësor në krye të Ministrisë së Drejtësisë
Një nga ministrat e rinj që do të jetë pjesë e kabinetit teknik, është edhe eksperti i Partisë Demokratike, Gazmend Bardhi, i cili do të drejtojë Ministrinë e Drejtësisë. Ai ka shërbyer si ekspert pranë selisë blu lidhur me reformën në Drejtësi. Megjithëse kreu i PD-së Lulzim Basha theksoi se ministrat e propozuar prej tij do të ishin teknikë, duket se këtu ka bërë një përjashtim të vogël duke shpërblyer me postin e ministrit të Drejtësisë ekspertin e tij për reformën në sistemin gjyqësor.
Të gjitha këta emra do të votohen nga Kuvendi nesër në orën 18:00. Kabineti i ri teknik do të drejtojë vendin deri në formimin e qeverisë se në shtator. Periudhat më delikate me të cilat do të përballet ky kabinet teknik do të jenë fushata elektorale, dita e zgjedhjeve 25 qershor, dhe administrimi i gjithë procesit deri në daljen e rezultatit të zgjedhjeve dhe kalimin e pushtetit tek qeveria e re.
Në linkun e mposhtëm keni të detajuar eksperiencën dhe shkollimin e zëvendëskryeministres dhe 6 ministrave të rinj teknikë:
(TIRANA TODAY)
CV-ja e ministrave teknikë të propozuar nga kreu i PD-se, Lulzim Basha by Bardhi Quku on Scribd
