Rusia u jep fund sanksioneve ndaj Turqisë. Lajmi u bë i ditur nga Zv/Kryeministri rus, Arkadiy Dvorkoviç, i cili u shpreh: “Këtë javë do të hiqen të gjitha pengesat dhe ndalesat mes Turqisë dhe Rusisë dhe të gjitha marrëveshjet do të zyrtarizohen brenda kësaj jave”
Sipas numrit dy të qeverisë ruse, deri tani procesi për konkretizimin e këtij plani, ka avancuar deri në 99% të tij dhe se po punohet vetëm rreth disa ndryshimeve formale.
“Sapo të firmoset protokolli do të fillojë anullimi i kufizimeve”, shtoi Dvorkoviç.
Marrëveshja për anullimin e pothuajse të gjitha sanksioneve ruse të aplikuara kundër Turqisë në sektorët e prodhimit, ndërtimit dhe tekstileve, u arrit në takimin mes Presidentit rus, Putin dhe atij turk, Erdogan më 10 Maj në Soçi.
Ndërsa kufizimet për aplikimet e viza të nënshtetasve Turq, do të vijojnë të mbeten në fuqi.
Anullimi i sanksioneve të aplikuara kundër Turqisë, do të njoftohet edhe nga Kryeministri, Dimitri Medvedev, në Samitin e Bashkëpunimit Ekonomik të Detit të Zi, i cili do të mbahet 22 Maj në Stamboll.
