Lista e kandidatëve të Partisë Socialiste për zgjedhjet e 18 qershorit ka shkaktuar pakënaqësira të mëdha.
Një tjetër deputet ka reaguar lidhur me lënien jashtë kësaj liste. Bëhet fjalë për Piro Lutaj, i cili falendëron mallakastriotët që e votuan për tre mandate me radhë.
Gjithashtu, Lutaj u thotë atyre se do të jetë po i njëjti njeri i 12 viteve më parë, kur u thirr në zyrë nga kryeministri i asaj kohe Fatos Nano për t’u bërë përfaqësues i elektoratit të majtë në Kuvend.
POSTIMI I PLOTË I PIRO LUTAJT:
Mirënjohje me përulësi për të gjithë mallakastriotët e mrekullueshëm, fjalëpak e punëshumë, të cilët më besuan dhe votuan si përfaqësues të tyre në Kuvendin e Shqipërisë për 3 mandate rresht, (2005-2009-2013)!
Trëndafili që po postoj është fotografuar 2 ditë më parë në oborrin e shtëpisë së prindërve të mi në Hekal!
Kështu, të qeshur e të gëzuar e dua dhe do ta dua unë në jetë të jetëve çdo qytetar të Mallakastrës, i majtë apo i djathtë qoftë!
Kjo është tradita e familjes time brez pas brezi dhe Mallakastriotet e dinë këtë gjë!
Tek unë nuk ka ndryshuar asgjë, do jem vazhdimisht aty ku kam lindur dhe jam rritur, tek trualli i Sulo Mustafait!
Për mallakastriotët do të jem po ai djalë, që gati 44 vjet më parë në moshën 14 vjeçare fillova shkollën ushtarake Skënderbej, dola oficer, punova nëpër disa institucione të sigurisë në vend dhe bëra një karrierë deri në Gjeneral Brigade!
Do të jem po ai njeri që fiks si sot 12 vjet më parë, u thirra nga ish-Kryeministri dhe Kryetar i PS së asaj kohe Fatos Nano për të konkurruar e bërë deputet që të përfaqësoja krahinën time në Kuvendin e Shqipërisë!
Gjatë gjithë këtyre viteve (8 në opozite e 4 në mazhorancë) nuk më ka munguar as kurajoja e as aftësia që problemet e panumërta të asaj zone, t’i bëja prezent nga foltorja e Kuvendit apo edhe nëpër institucione shtetërore të të gjitha niveleve.
Kam qenë në çdo moment pranë banorëve të Mallakastrës jo vetëm për evenimente zyrtare, por për ato familjare qofshin për mirë apo për keq !
Po ashtu jam përpjekur që edhe në jetën parlamentare, komisione apo seanca plenare të reflektoj dije, kulturë e profesionalizëm duke përfaqësuar PS në komisionin për Sigurinë Kombëtare bashkë me kolegët e mi të jashtëzakonshëm, Arben Cuko, Xhemal Qefalia, Paulin Sterkaj, Pjerin Ndreu, Anduel Xhindi dhe Shkëlqim Troplini!
Nga ana tjetër, i mirëkuptoj të gjithë ata mallakastriotë që kanë pritur që unë të bëja më shumë për zonën në përgjithësi dhe për secilin prej tyre në veçanti, por kjo është një çështje tjetër!?
Edhe një herë për secilin mallakastriot, kudo qoftë e me kë do qoftë,
Më shume respekt dhe konsideratë
Piro Lutaj
