Ish-deputeti Dritan Prifti ka njoftuar se nuk do të kandidojë si deputet në zgjedhjet e 18 qershorit. Lajmin e bën të ditur përmes një postimi në Facebook, ku tregon edhe arsyen e moskandidimit të tij.
Prifti shkruan se ka mbi një vit që po lufton me një sëmundje agresive gjaku. Ai shkruan se nuk mund të shkëputet për fushatë, pasi kurimi zgjat edhe disa muaj.
Prifti bën edhe një parashikim për zgjedhjet. Sipas tij, ato do dështojnë pa opozitën dhe do ripërsëriten shpejt, ndërsa kërkon njëkohësisht nga miqtë e tij që të luten për shëndetin e ish-ministrit.
Së fundmi, Prifti e mbyll duke rrëfyer se nuk do të votojë në këto zgjedhje, pasi mendon se Shqipëria është varfëruar dhe ka ecur mbrapa, pra nuk ka një motiv për të votuar.
Më poshtë postimi i plotë i Priftit:
Përshëndetje miqtë e mi.
E di që jeni kuriozë të dini nëse unë do kandidoj në zgjedhjet e 18 qershorit. Nuk do kishte kënaqësi më të madhe për mua, sesa të kisha mundësi të kandidoja dhe përfaqësoja përsëri Ju në politikë. Por nuk mundem fizikisht. Kam mbi një vit që luftoj me një sëmundje agresive dhe të vështirë gjaku. Kurimi vazhdon dhe pak muaj dhe nuk më jep mundësi të shkëputem për fushatë. Kam bindjen që do ta kaloj dhe këtë siklet shpejt.
Nuk dua të mërziteni. Këto zgjedhje nga mënyra si po bëhen, pa opozitën, do dështojnë dhe do ripërsëriten shpejt. Lutjuni Zotit, nëse besoni, që unë ta kaloj shpejt këtë sëmundje dhe të jemi bashkë në momentin më të parë.
Unë nuk do votoj në këto zgjedhje. Nuk mendoj se dhe ju keni motiv të votoni. Shqipëria ka ecur mbrapa drejt varfërimit dhe mungesës së demokracisë. Megjithatë, askush nuk mendon për ju, nëse nuk mendoni për vetë. Nëse do votoni, bëjeni për interesin tuaj dhe askujt tjetër.
Ju përqafoj
Dritan Prifti
