Lista e Partisë Socialiste ka qenë vërtet surprizuese, duke marrë parasysh mungesat e shumë deputetëve socialistë, të cilët Rama i nxori nga “loja” si pa të keq.
Sigurisht, mes tyre ka pasur hatërmbetje, ndërsa ka pasur edhe nga ata që e kanë cilësuar zgjedhje personale për të hequr dorë nga politika, siç ishte Valentina Leskaj.
Por, ajo që të habit në listën e kandidatëve të Partisë Socialiste është një tjetër “blerje” e Ramës, deputeti i Elbasanit, Luan Duzha. Ky i fundit ka ndërruar tri parti brenda një legjislature parlamentare.
Ai u zgjodh deputet për herë të parë në zgjedhjet e 2013-ës, në qarkun e Elbasanit, kur kandidoi nën siglën e Partisë Republikane, duke siguruar një vend në parlamentin e dalë nga ato zgjedhje.
Por, pas një muaji, Duzha vendosi t’i braktiste Republikanët, duke iu bashkuar radhëve të Lëvizjes Socialiste për Integrim. Duket se ai nuk u rehatuar as me LSI-në, duke e braktisur këtë të fundit për të kandiduar si deputet i PS-së, ku renditet i gjashti në listë nga kandidatët e Elbasanit.
