Presidenti i ri, Ilir Meta, është akuzuar për korrupsion shumë herë nga kundërshtarët e tij politikë këto 25 vitet e fundit, megjithëse akuzat kundër tij, gjithnjë janë rrëzuar. Dy akuzat më të mëdha që kanë hyrë në një proces hetimor janë:
Video e publikuar në emisionin investigativ “Fiks Fare”
Në janar 2011, ndërsa ishte në koalicion qeveritar me demokratët e Berishës, emisioni investigativ “Fiks Fare” i Top Channel, transmetoi atë që supozohet të jetë një bisedë e fshehtë mes Metës dhe Dritan Priftit, atëherë ministër i Ekonomisë.
Video e shfaqte Metën duke folur me Priftin për të ndërhyrë në një tender publik dhe duke diskutuar ryshfete në lidhje me të. Të dy më pas u shfaqën teksa diskutonin për ndikimin e padrejtë në caktime publike për të favorizuar kandidatë të partisë së LSI-së.
Menjëherë pas kësaj, rezultoi se video u publikua nga Prifti, i cili u hoq nga posti i tij ministror shtatorin tjetër. Meta më pas mori postin e tij.
Pasi video u publikua, Meta dha dorëheqjen nga qeveria duke thënë se ishte i hapur për hetim, por iu referua filmimit sekret si “veprim i grupeve kriminale”.
Video shkaktoi protesta që u drejtuan nga Rama. Më 21 janar, protesta u kthye e dhunshme dhe katër protestues u vranë e dhjetëra u plagosën nga Garda e Republikës.
Meta u akuzua për korrupsion në maj 2011, pasi Prokurori i Përgjithshëm hapi një investigim. Ai u përball me dy vjet burg dhe një gjobë prej 7000 eurosh, nëse do të ishte fajtor.
Prokuroria e konsideroi videon origjinale dhe përdori dëshmi ekspertësh nga Amerika dhe Britania.
Megjithatë, Gjykata e Lartë e pastroi Metën në janar 2012, nga të gjitha akuzat, duke cituar mungesën e provave, pasi tre ekspertë shqiptarë – të punësuar nga gjykata – e deklaruan videon montazh.
Investigimi i “BIRN” për çështjen e kontratave mes CEZ dhe DIA
Meta sërish përfundoi i akuzuar për korrupsion, në shtator të vitit 2015, pas një investigimi të BIRN, që zbuloi se një firmë ligjore, e cila përfaqësonte firmën energjetike shqiptare OSHEE, pretendoi se lideri i LSI-së kishte marrë ryshfet nga agjencia e mbledhjes së borxhit, Debt International Advisory, DIA.
Akuza u shfaq si pjesë e një mosmarrëveshje mes OSHEE dhe DIA, që u paraqit në Qendrën Ndërkombëtare të Arbitrazhit në Vjenë, në 2013. DIA ngriti padi kundër OSHEE, që atëherë zotërohej nga gjiganti çek i energjisë, CEZ.
Një mocion për të anuluar çështjen, ngritur nga qendra arbitrare nga avokatët e OSHEE, Clifford Chance, pranon se Meta ishte një nga përfituesit e një pagese mashtruese prej 4.5 milionë eurosh nga CEZ Shpërndarje te DIA, në 2010 dhe 2011.
Gjatë një seance parlamentare në tetor 2015, Meta sulmoi BIRN Albania dhe e denoncoi investigimin e BIRN si një konspiracion “mafioz” kundër tij.
Meta nuk u akuzua kurrë në lidhje me çështjen dhe nuk u përfshi në hetimin pasues të prokurorisë për DIA-n. Politikanët e opozitës kërkuan një hetim ndërkombëtar, kryesuar nga prokurorë të huaj, por ai nuk u ngrit kurrë.
Shqipëria fitoi mosmarrëveshjen në arbitrazh në procedurë teknike. Pronari i DIA-s, Kastriot Ismailaj u akuzua atëherë nga Prokuroria shqiptare për pastrim parash dhe mashtrim të lartë. Gjyqi i tij vazhdon. Një nga drejtorët e DIA-s, Rebeça Gaskin Gain, mendohet të ketë bashkëpunuar me autoritetet dhe nuk u akuzua.
Ismailaj që atëherë u arrestua, u akuzua për pastrim parash dhe mashtrim të nivelit të lartë.
Në një intervistë për revistën Mapo, të publikuar në gusht 2016, Meta i përshkroi të gjitha akuzat me të cilat ishte përballur si të motivuara politikisht. Ai bëri me dije se kishte pasur një jetë më të vështirë se shumëkush dhe se e kishte marrë veten shpejt, gjithashtu nuk i ishte trembur burgut kurrë.
“Nëse Fatos Nano (kryetar i Partisë Socialiste dhe ish-kryeministër), i lindur në mes të Tiranës, e kaloi me sukses burgun politik, burgu do të ishte më i lehtë për mua, i lindur mes maleve dhe do të më motivonte të çoja më përpara LSI-në dhe të mbroja demokracinë e vendit tonë”, tha Meta.
Tani që Meta u zgjodh President nuk mund të hetohet, por menjëherë lindin dyshime se cila do jetë e ardhmja e tij. Pyetja që po bëhet aktualisht është: Sa vite do të qëndrojë Meta në krye të Shtetit?
Tirana Today
