Monika Kryemadhi ka folur për mediet pas zgjedhjes së bashkëshortit si President i vendit. Zonja Kryemadhi ka deklaruar se nuk ka pasur akoma mundësinë që të urojë bashkëshortin e saj. Ashtu si dhe Presidenti i ri, Kryemadhi e vuri theksin e fjalës së saj te situata politike në vend dhe te ngërçi zgjedhor.
“Nuk do të lejojmë që situata të përshkallëzohet dhe të shkojë si në Maqedoni. Dhe ju gazetarët nuk do të donit që të ishit në situatën që u ndodhën mbrëmë kolegët tuaj në parlamentin e Maqedonisë”, tha Kryemadhi.
E pyetur nga gazetarët se çfarë mendimi kishte tani që bashkëshorti i saj u zgjodh President i vendit, Kryemadhi tha se: “Unë do të preferoja kandidaturën e Petrit Vasilit ose Arta Dades për postin e Presidentit të vendit. Por duhet t’i nënshtrohemi vullnetit të shumicës. Shumica votoi Ilirin për President dhe ne duhet që ta pranojmë”.
“Shumë shpejt do të mblidhet kryesia e LSI-së për të marrë vendimet e duhura për ecurinë e LSI-së. Deri sa të betohet si President i Republikës së Shqipërisë, Ilir Meta do të vijojë të jetë kryetari i Lëvizjes Socialiste për Integrim. Pas largimit të Metës, zëvendëskryetari, Petrit Vasili bëhet automatikisht kryetar deri në zgjedhjet e reja brenda partisë. Në LSI gjithkush mund të kandidojë për kryetar, sipas parimit një anëtar një votë. Unë do të jem në krye të fushatës zgjedhore vetëm për qarkun që drejtoj”, është shprehur Monika Kryemadhi para gazetarëve.
