Tre aksidente kanë përgjakur sot rrugët në të gjithë vendin, si pasojë e të cilëve ka mbetur i vdekur një person dhe janë plagosur disa të tjerë.
Lushnjë – Rrogozhinë
Një aksident me vdekje ka ndodhur mbrëmjen e sotme në aksin Lushnjë – Rrogozhinë.
Nga informacionet e para mësohet se një makinë ka përplasur një motorçikletë. Drejtuesi i motorit ka humbur jetën për shkak të dëmtimeve.
Në vendngjarje ndodhet policia, e cila ka nisur hetimet për të zbardhur shkaqet.
Kamzë
Po ashtu, tre persona kanë mbetur të plagosur nga një aksident rrugor i ndodhur pasditen e sotme në Kamzë.
Siç bëjnë me dije burime zyrtare nga policia, përplasja mes dy makinave ka ndodhur rreth orës 19:00.
Si pasojë e përplasjes, njëri nga drejtuesit e mjeteve ka ngelur në brendësi të mjetit dhe ka qenë e nevojshme ndërhyrja e forcave zjarrfikëse për nxjerrjen e tij.
Në spitalin “Nënë Tereza” janë dërguar shtetasit F. P., 30 vjeç, K. K., 34 vjeç dhe M. M., 28 vjeç, të cilët ndodhen jashtë rrezikut për jetën, njoftojnë të njëjtat burime. Grupi hetimor po punon për zbardhjen e plotë të rrethanave të këtij aksidenti.
Tiranë-Durrës
Një tjetër aksident masiv u raportua më herë në autostradën Tiranë-Durrës, ku disa makina që janë përplasur me njëra-tjetrën, çka ka krijuar edhe trafik në autostradë.
Sipas raportimeve, mësohet se nuk ka viktima, por dëmtimet e automjeteve janë të mëdha. Aksidenti ka ndodhur pas atentatit me 2 viktima, te mbikalimi i Sukthit, në Durrës.
