Kreu i opozitës, Lulzim Basha, po flet në “Çadrën e Lirisë”, ku ka kërkuar ndjesë që nuk arritën të bëjnë më shumë, kur PD ishte në qeverisje.
Veç premtimeve që bëri, Basha akuzoi Ramën se e ka lënë Shqipërinë në duart e të korruptuarve dhe se po rrjep shqiptarët me anë të koncesioneve.
Gjithashtu, Basha e quajti pafytyrësi gjestin e Fatmir Xhafajt, i cili i dërgoi një letër Llallës, lidhur me dyshimet mbi asgjësimin e rrënjëve të kanabisit.
Ndër të tjera, Basha tha:
“Shikoni se sa e urren kjo çetë e korruptuar kriminale popullin e vet. Vjedhin përmes koncesioneve të cilat paguhen përmes buxhetit të shtetit. Pra rrisin taksat, ju vjedhin ju dhe më pas ia japin kompanive fantazma. 100 milionë euro do të mjaftonin që çdo vit të kishte 25 % rritje të pensioneve, por lekët tuaja i vjedh Edi Rama me Ilir Beqën.
Vjedhin paratë e buxhetit, por buxheti 4 miliard në vit është. Kanë shpikur mënyra të tjera për të vjedhur jo vetëm në kurriz të xhepave të qytetarëve, por edhe në kurriz të shëndetit të qytetarëve.
Duan ligjin e mbetjeve sepse duan që në Elbasan, në Tiranë, në Durrës t’i shpifin kancerin këtij populli duke djegur plehrat e Italisë vetëm për të mbushur xhepat e tyre.
Nuk iu mjaftojnë koncesionet, tani po ndërtojnë inceleratorët e helmeve, po s’ka gjë se ua merr Edi Rama me 40 hajdutë, mjafton që të mbushin xhepat e tyre.
Ky është komploti kundër qytetarëve, kundër fëmijëve tuaj. Për këtë arsye është thirrur në ndihmë llumi, ata që shesin motrat tona, më të ndyrët që shoqëria ka, që Edi Rama i ka bërë kryetarë bashkish dhe drejtorë e sot u ka dhënë çelësat e territorit.
Fasada vazhdon punën, vazhdon teatri politik. Fatmir Xhafaj, njësoj sikur i akuzonte të rinjtë e Krujës duke i akuzuar se kishin pirë një gotë raki kur vdiq Enver Hoxha, i shkruan Llallës dhe i thotë më thuaj se cilat janë rastet kur nuk janë kapur narkomenët.
Vëllai i Agron Xhafajt, Fatmir Xhafaj, i shkon për shtat të përpiqet të mbulojë gjurmët e ujkut, po ujku duket qartë.
2.6 milion rrënjë kemi shkatërruar thonë, tani pyetja është e thjeshtë, na trego procesverbalet e shkatërrimit të 2.5 milion rrënjë kanabisi. Ku i ke? Na i trego, tregojua shqiptarëve! Po nuk i tregon dot se droga u magazinua nga kupola e banditëve të Shqipërisë dhe po del sot 1 pjesë e saj kur kapet në Itali.
Nuk ka si ta dorëzojë Edi Rama. Nuk do të ketë subvencione për fermerët sepse paratë shkojnë për koncesionet.
Nuk mund të ketë përmirësim në arsimin shqiptar, se nuk ka lekë për arsimin, nuk ka lekë për shëndetësinë, në Fier duan të ndërtojnë një spital me koncesion që t’i rrjepin fierakët. Asgjë nuk ka për të ndryshuar nëse e lëmë në këmbë fasadën, por ne jemi të mbledhur këtu e nuk do të shpërndahemi derisa ta hapim ligjërisht rrugën e Republikës së Re përmes zgjedhjeve të lira e të ndershme, ku qytetarët do kenë përsëri fatin e tyre në dorën e tyre dhe qeveria do jetë përgjegjëse jo para oligarkëve.
Garancia e vetme e Republikës së Re është ky bashkim qytetar dhe qartësia e vendosmëria juaj.
Ne nuk duam pushtet në tavolinë, duam vetëm zgjedhje të lira e të ndershme. Ramës nuk i kërkoj të shporret, edhe pse e meriton. Jemi të vendosur ta çojmë betejën deri në fund.” / Tirana Today
