Kryeministri Edi Rama do që në parlamentin e ri të mos ketë kriminelë.
Nisur nga ligji i Dekriminalizimit, kreu i Partisë Socialiste i kërkon kryeprokurorit Adriatik Llalla, t’i verifikojë grupin aktual parlamentar.
Në këtë mënyrë, duket se Rama po përzgjedh listën e deputetëve për zgjedhjet parlamentare të 18-qershorit.
Kreu i PS-së u ka ngarkuar drejtuesve të 12 qarqeve listat e deputetëve, si dhe ka kërkuar më shumë gra e të rinj si asnjëherë tjetër.
Nisur nga kjo kërkesë, Rama dëshiron ta ketë të pastër edhe grupin parlamentar aktual, ku emrat e papërlyer t’i kandidojë në zgjedhje.
Ky verifikim parashikon trajtimin e të gjitha të dhënave të deklaruara nga deputetët e PS. Kryeprokurori pritet që t’i kthejë përgjigje përpara 29 prillit, ditës kur në Komisionin Qendror të Zgjedhjeve do të dorëzohet zyrtarisht lista me emrat e kandidatëve për deputetë, transmeton Top Channel.
Por, sesa do të mundet që kryeprokurori Adriatik Llala t’i kalojë në sitë deputetët aktualë të Partisë Socialiste dhe ata që aspirojnë për të qenë pjesë e legjislaturës së ardhshme, kjo mbetet për t’u parë.
Megjithatë, Edi Rama kërkon të heqë njollën e zezë që ia ngjiti vetë Parlamentit, kur bëri deputetë persona me të shkuar kriminale, si Artur Bushi, Pjerin Ndreu, Mark Frroku, Tom Doshi, Arben Ndoka, Armando Prenga etj.
Ndaj, këtë radhë, Rama është vënë në kërkim të një parlamenti pa kriminelë, të paktën nga grupi i tij parlamentar socialist.
