Kryeministri Edi Rama e ka shprehur hapur se ai është produkt politik i ish-kryeministrit britanik Tony Blair dhe ish-këshilltarit të këtij të fundit, Alastair Campbell.
Në një intervistë për “Politico.com”, Rama tha se po të mos ishte për këta të dy, ai nuk do të ishte sot politikan dhe, aq më tepër, kryeministër.
“Nëse Tony Blair, Alistair Campbell dhe Laburistët nuk do të ekzistonin, unë nuk do të isha bërë politikan. Ata më kanë inspiruar. Pavarësisht, luftës në Irak, nuk mund të harrojmë gjërat e mëdha që Tony Blair ka bërë si kryeministër i Britanisë së Madhe”, u shpreh Rama.
Rama ka marrë shpesh këshilla politike nga Blair dhe Campbell, për mënyrën sesi po e qeveris vendin, dhe rezultatet janë të dukshme; kryeministri po përballet me krizën politike në vend, kur opozita ka bojkotuar Parlamentin dhe ka vendosur të mos marrë pjesë në zgjedhjet e 18 qershorit, që, sipas saj, nuk do të jenë të lira dhe të ndershme.
Ndërsa Rama ka refuzuar kërkesën e opozitës për krijimin e një qeverie teknike, e cila do të menaxhonte zgjedhjet e qershorit.
“Nuk mund të marrësh peng procesin demokratik, nuk mund të marrësh peng Kushtetutën”, tha Rama.
Me opozitën, e cila po proteston me mbështetësit e saj përpara Kryeministrisë dhe problemet që ka me partnerin e tij në koalicion, Ilir Meta, Ramës do t’i duhet të marrë sërish këshilla nga Tony Blair, për të negociuar me opozitën në ditët në vijim.
Tirana Today
