Kreu i partisë LIBRA, Ben Blushi, theksoi sot se frika e liderëve kryesorë politikë nga sistemi i drejtësisë po e mban peng reformën në drejtësi dhe zgjedhjet e 18 qershorit. Për këtë aryse, sipas Blushit, palët duhet të ulen dhe të tregohen të përgjegjshme që të normalizojnë situatën politike.
‘‘Koha për tu ulur në tryezë po skadon, duke cenuar rëndë integritetin dhe legjitimitetin e zgjedhjeve të ardhshme parlamentare. Në qoftë se pyesni sot ka shumë arsye se pse zgjedhjet po cenohen, sigurisht është konfliktualiteti i partive të vjetra që po u sekuestron shqiptarëve të drejtën për të votuar dhe është korrupsioni, pra frika nga drejtësia që po pengon ecurinë e reformës në drejtësi dhe zgjedhjeve njëkohësisht.’’
Blushi tha se LIBRA është e vendosur për të hyrë në zgjedhje, pasi kjo është e vetmja mënyrë për të treguar se pushteti mund të ndryshohet me votë.