Kreu i PD-së, Lulzim Basha, reagoi pas takimit Rama-Meta, të cilët dolën në përfundimin që t’i drejtohen Partive Popullore Evropiane dhe Eurokomisionerit për Zgjerimin, Johannes Hahn, për të zgjidhur krizën politike. Sipas Bashës, kudo që të adresohen Rama me Metën, opozita nuk del nga çadra, pa krijimin e qeverisë teknike.
“Meqë PS-LSI i kanë zgjidhur punët me njëri-tjetrin dhe kanë dalë me platformë për t’iu drejtuar PPE-së, kërkojeni ku të doni, pa qeveri teknike nuk ka zgjedhje në Shqipëri. Kështu që sa më shumë kohë iu vidhni shqiptarëve, aq më e rëndë fatura për vendin. Do bëj gjithçka, ju siguroj nga thellësia e shpirtit, që pjesën më të madhe të kësaj fature ta paguani ju. Lërini demagogjitë, zgjidhini punët me socialistët tuaj se një pjesë e dinë që jeni të inkriminuar, se me PPE-në ka kush flet. Rruga për dialog është e hapur për ne, por harrojeni se dialogu do të jetë një harxhim total kohe për ata që kanë frikë të lënë pushtetin. Dialogu ka një objektiv të rakorduar tash 9 ditë, qeveri teknike dhe mandati për qeveri teknike dhe zgjedhje të lira dhe të ndershme.”
