Ditën e djeshme, kreu i PBDNJ hodhi akuza të rënda lidhur me diplomatët e huaj në vendin tonë.
Ai tha se një diplomat i rëndësishëm i ka bërë atij një ofertë të pistë, në prani të 4-5 aleatëve të PD-së.
Sipas Dules, oferta nënkuptonte që PBDNJ të braktiste kauzën e Partisë Demokratike dhe të hynte në zgjedhje. Shpërblimi? Marrja e sa më shumë mandateve nga ato të lëna bosh nga PD-ja.
Kreu i PBDNJ u tregua i rezervuar në dhënien e emrit të diplomatit, ndërsa një fakt të tillë e ka pohuar edhe Basha sot në çadër. Ky i fundit ka përsëritur akuzat e Dules, teksa e ka cilësuar Vettingun një projekt mafioz e ndërsa flet për një diplomat të korruptuar:
“Projekti i Vettingut është një projekt mafioz, ku janë përfshirë diplomatë të lartë në Tiranë për llogari të Edi Ramës, kanë marrë peng ekspertët e BE-së dhe së shpejti do të vijë ora kur të japin përgjegjësi demokratike në një institucion demokratik siç është Bashkimi Europian”, deklaroi Basha.
Deklartatat e Dules i ka përshëndetur edhe ish-ministri i Drejtësisë, Ylli Manjani, i cili shkruan se më mirë që vendi të jetë në krizë sesa në paqe false me diplomatët e huaj në Tiranë.
Statusi i plotë i Manjanit në Twitter:
‘‘Më mirë në krizë sesa në paqen e stisur të disa ambasadorëve të huaj! Mjaft me eksperimente! Jemi anëtar i KE dhe NATO-s! Respekt z.Dule!’’
