Kryetari i Lëvizjes Socialiste për Integrim, Ilir Meta ka lëshuar një mesazh kundrejt kryeminstrit Rama dhe kreut të PD-së Lulzim Basha, të cilët sipas tij, duhet të lëshojnë pe ndaj njëri-tjetrit për të arritur një marrëveshje që do të mund të zgjidhte krizën politike.
“Kur duhet një kompromis të gjithë duhet të lëshojnë nga pak, përpara se të jetë vonë dhe të ndodhi një përplasje apo një krizë edhe më e madhe ku do të jetë edhe më e vështirë për t’i qetësuar gjërat.”, u shpreh Meta gjatë një takimi me banorë të njësisë administrative nr. 7 në Tiranë.
Ai theksoi gjithashtu se zgjedhjet duhen zhvilluar në një mjedis të qetë, demokratik dhe larg përplasjeve.
“Ne orientojmë vendin drejt stabilitetit. Pa stabilitet nuk ka siguri, nuk ka qetësi, nuk ka mundësi, as për investime, as për shërbime më të mira. Zgjedhjet janë të shqiptarëve, dhe duhen zhvilluar në një mjedis normal, në një mjedis të qetë, në një mjedis demokratik, larg këtyre përplasjeve tërësisht jo normale”, – deklaroi Ilir Meta.
