Kryetari i PD-së, Lulzim Basha, u shpreh i gatshëm të mirëpresë kundërshtarin e tij politik, Edi Rama, në çadrën e PD-së. Duke folur pak minuta pasi Rama kishte shkruar në Facebook se ishte në pritje të përgjigjes së Bashës, lideri i opozitës nuk vonoi të reagonte, duke i kërkuar dorëheqjen kryeministrit Rama.
“Ka shprehur dëshirën që të vijë në çadër? Unë them që një shteg duhet t’ia lëmë. Po të vijë me dorëheqjen e firmosur? Ka 36 orë që negociatori i PD dhe i opozitës për të përgatitur një dialog, në funksion të krizës pret të dërguarin e kryeministrit. Por, kryeministri nuk do dialog, do monolog. Dialog për zgjidhje, për zgjidhjen e krizës politike për formimin e një qeverie teknike, me mbështetje politike që të zbatojë dekriminalizimin rrugën kundër drogës. Ky dialog i përgatitur me qëllim që të ketë sukses dhe jo të shkojë drejt dështimit. Për këtë kemi 36 orë që i kemi vënë në dispozicion negociatorin tonë. Përndryshe përballja vazhdon deri në fitore”, tha Basha.
