Kryetari i PD-së, Lulzim Basha, ashpërsoi sot ligjërimin e tij politik, duke arritur deri aty sa e cilësoi faktorin politik ndërkombëtar, që ka dalë kundër kauzës së tij, si të korruptuar dhe të papërgjegjshëm.
Duke folur nga çadra e protestës para kryeministrisë, në ditën e 49- të saj, Basha u shpreh se ata ndërkombëtarë, që dalin kundër zgjedhjeve të lira dhe të ndershme, janë ose të papërgjegjshëm, ose të korruptuar.
“Ka miq dhe dashamirës të Shqipërisë që për një aryse apo një tjetër nuk kanë informacionin e plotë. Me ta duhet të kemi durim, duhet të kemi të hapur rrugën e dialogut për të informuar mbi këto të zeza. Ka edhe të tjerë që nuk duan të informohen. Atyre, pavarësisht se nga vijnë dhe çfarë posti mbajnë, u them: që të mbyllësh sytë para krimit dhe drogës, do të thotë që je ose i papërgjegjshëm ose i korruptuar nga paratë e narkomafies shqiptare”, tha Basha.
