28 vite më parë, mijëra studentë u rebeluan ndaj regjimit komunist, dhe pas 3 ditësh arritën të impononin shpalljen e pluralizimit politik. Pas gati 3 dekadash, shumë nga ne janë bërë cinikë me këtë lëvizje. Kjo pasi ajo u përvetësua shpejt nga ish-anëtarët e Partisë së Punës, që në cilësinë e politikanit “profesionist”, i rropën dhe sunduan shqiptarët.
Sot shumë ish-protagonistë të asaj lëvizje, u mënjuan dhe mërguan jashtë vendit. Ka pretendime se lëvizja studentore u vu që në fillim në kontroll nga agjentët e Sigurimit të Shtetit. Disa thonë madje se nuk pati fare rrëzim të regjimit, por një kalim konsensual nga tirania në të ashtuquajturën “demokraci”, që ende nuk po e ndërtojmë dot si duhet.
Gjithsesi, idealet e lirisë dhe demokracisë nuk kanë vdekur. Protestat e mijëra studentëve ditët e fundit, kanë sjellë paralele me lëvizjen e 28 viteve më parë. Shumë qytetarë të demoralizuar, të mbetur në bisht të zhvillimit ekonomik kaotik të vendit, shpresojnë që studentët të luftojnë për shumë më tepër sesa vetëm kushtet në universitet.
Të jenë ndoshta promotorë të një lëvizje të re politike, për të nxjerrë jashtë loje partitë e vjetra, që e kanë sfilitur këtë vend. A munden studentët t’i bëjnë sërish shqiptarët të ëndërrojnë. Mjerisht, zhgënjimet në Shqipëri janë bërë kapicë. Të presim dhe të shohim…
