Këshilli i Ministrave ka vendosur që me propozim të ministres së Kulturës, Elva Margariti, të shkarkojë nga detyra drejtorin e Cirkut Kombëtar, Saimir Çilin.
Vendimi i Këshillit të Ministrave është marrë ditën e sotme dhe mban firmën e kryeministrit Edi Rama.
Kujtojmë se Saimir Çili ka qëndruar në krye të këtij posti për rreth 2 vite. Kantautori ishte emëruar në këtë detyrë nga ish-zv/kryeministria Senida Mesi ndërkohë që Çili kishte afro dy dekada që punonte në ish-Estradën e Tiranës, që kishte në varësi edhe Cirkun. Ndërkohë nuk është komunikuar ende një emër tjetër që do të pasojë Saimir Çilin në këtë detyrë.
VENDIMI I PLOTË:
VENDIM PËR LIRIMIN NGA DETYRA TË DREJTORIT TЁ CIRKUT KOMBËTAR
Në mbështetje tё pikës 2, të nenit 100, të Kushtetutës, dhe të pikës 4, të nenit 9, të ligjit nr.10352, datë 18.11.2010, “Për artin dhe kulturën”, të ndryshuar, me propozimin e ministrit të Kulturës, Këshilli i Ministrave
V E N D O S I:
Sajmir Çili lirohet nga detyra si drejtor i Cirkut Kombëtar.
Ky vendim hyn në fuqi menjëherë.
KRYEMINISTRI EDI RAMA
