Një kapiten ushtarak nga Qipro, është ndëshkuar me 7 dënime me burgim të përjetshëm. Ushtari u deklarua fajtor për vrasjen e 5 grave dhe 2 fëmijëve brenda një periudhe trevjeçare.
Nikos Metaxas, 35-vjeç, nga pjesa greke e Qipros i kishte mashtruar viktimat e tij përmes internetit. Ky rast, i cili shënon dhunën më të tmerrshme ndaj grave në Qipro, ka shkaktuar reagime të shumta dhe tmerr në ishullin ku krimet serioze janë relativisht të rralla.
Ministri i Drejtësisë ka dhënë dorëheqjen për shkak të këtij rasti dhe është shkarkuar edhe komandanti i policisë. Metaxas u pa duke qarë në kohën kur po lexohej aktakuza kundër tij.
“Unë kam kryer krime të tmerrshme”, tha ai, duke iu shprehur ngushëllime familjeve të viktimave të tij.
35-vjeçari, e pranoi fajin për 12 akuza lidhur me vrasje të paramenduar dhe rrëmbim të shtatë personave nga shtatori i vitit 2016 deri në korrik të vitit 2018. Viktimat ishin nga Filipinet, Rumania dhe Nepali. Në mesin e viktimave ishin edhe dy fëmijë të moshës 6 dhe 8-vjeçare. Këta dy fëmijë të gjinisë femërore ishin vajza të dy prej grave të vrara.
