Pas marshimit në qytetin e Shkodrës, për largimin e bandave dhe kriminalitetit në vend, kryeministri Edi Rama ka marrë një tjetër mesazh nga të rinjtë e FRPD-së. Një grup të rinjsh janë bërë bashkë në stadiumin ‘Elbasan Arena’, ku është duke u luajtur sfida Shqipëri-Izrael. Duke përfituar nga situata, ata kanë nxjerrë banderolën ku shkruhej ‘Rama ik!’.
Opozita prej ditësh ka ngritur zërin ndaj bandave që janë ulur këmbëkryq, dhe asnjë prej tyre nuk kapet. Ata madje shkojnë më tej duke përmendur emra deputetësh, si të lidhur me mafien.
Shkodra është tronditur nga një sërë atentatesh mafioze gjatë muajve të fundit, të cilat thuajse të gjitha kanë mbetur të pazbardhura, ndërsa në qytet është krijuar një klimë e nderë tensioni. Opozita ka akuzuar në mënyrë të vazhdueshme se këto akte kriminale po kryhen nga banda të caktuara, të lidhura me qeverinë dhe që mbrohen nga kjo e fundit.
