Një operacion i madh policor në katër vende evropiane ka bërë të mundur ndalimin e 90 anëtarëve të grupit mafioz më të fuqishëm të Italisë, ‘Ndrangheta’. Operacioni u zhvillua vetëm disa ditë pasi kreu i dyshuar, ose “kumbari” i mafies siciliane, i njohur si Cosa Nostra, u arrestua me 46 njerëz të tjerë në rajonin e Palermos në Itali.
Është quajtur “Operacioni Pollino” dhe ka filluar dy vite më parë, duke u cilësuar si ‘goditje më e madhe ndaj një prej rrjeteve kriminale më të fuqishme italiane në botë”. Hetuesit e mafies vlerësojnë se xhiroja e tyre është në rreth 60 miliardë dollarë në vit, e ngjashme me GDP e Kroacisë apo Bullgarisë. Dhe kontrollon deri në 80% të kokainës që hyn në Evropë.
Ndrangheta ka qenë objektivi i bastisjeve, madje edhe i sanksioneve të Thesarit të SHBA për më shumë se një dekadë. E megjithatë, ajo ka ngritur ‘perandorinë’ e tregtisë së kokainës, duke krijuar lidhje me grupet e krimit të organizuar në Amerikën Latine, Nju Jork, Turqi dhe Shqipëri.
Po si arriti ‘Ndrangheta’ të kontrollonte tregun e kokainës:
Në fillim të viteve 1990, autoritetet italiane shkuan pas Cosa Nostra në Sicili pas vrasjes së dy prokurorëve kryesorë, Giovanni Falcone dhe Paolo Borsellino. Zora Hauser, një studiuese e krimit të organizuar në Universitetin e Oksfordit, thotë se kjo “e dobësoi dukshëm mafien siciliane”.
Ndrangheta mbajti një profil të ulët, por vazhdimisht zgjeroi aktivitetet e saj, nga fortesa në fshatrat malorë të Kalabrisë, në drejtim të Italisë jugore. Cecilia Anesi, një gazetare investigative e cila ka arritur të depërtojë shumë thellë në këtë grup, u shprehet se: Fillimisht ata krijonin të ardhura vetëm nga rrëmbimet dhe bastisjet, ndërsa brezi i ri që mori drejtimin po mendonte ti investonte këto para, dhe përgjigja ishte kokaina.
Duke u kthyer në një fuqi ekonomike, Ndrangheta investonte shumë para edhe në ekonominë ligjore në Itali dhe jashtë saj, për të qenë të mbrojtur.
Antonio Nicaso, i cili ka botuar rreth 30 libra rreth krimit të organizuar, duke përfshirë disa rreth ‘Ndrangheta’, thotë se ata kanë krijuar lidhje me prodhuesit dhe shpërndarësit e drogës në të gjithë Amerikën Latine: në Peru, Kolumbi, Guajana dhe Brazil.
Nicaso tha për CNN se: ‘Ndrangheta’ arriti të kontrollojë të gjitha rrugët kryesore të trafikimit, duke përfshirë portet në Brazil dhe Afrikën Perëndimore. Gjithashtu kontrollonte portet në Antëerp dhe Rotterdam. Një kompani e madhe në Kolumbi fshehu sasi të mëdha të kokainës në eksportet e qymyr druri në Europë; një tjetër bëri të njëjtën gjë, por me drurë nga Guajana.” TIRANA TODAY
