Një derbi i bukur, entuziazmues dhe plot me emocione, një barazim 1-1 i cili nuk mund të ishte më i drejtë se kurrë, pasi si Lacio, ashtu sikurse Roma nuk meritonin të dilnin “duarbosh” nga 90-minutëshi i djeshëm. Ndoshta, por të ishte një ndeshje boksi, ku në rast barazimesh fituesi del me pikë. Ndoshta Lacio mund të kishte merituar diçka më shumë, duke qenë se goditi 4 herë shtyllën, ndërsa Roma dy herë.
Fitorja e derbit të kryeqytetit u “var” në shtylla e traversa, por në fund të gjithë mund të jenë të lumtur, duke qenë se të dyja skuadrat dolën pa “plagë” të mëdha. Thomas Strakosha, shqiptari që konfirmohet çdo vit si një ndër liderët e formacionit bardhekaltër, ka meritën që diti të mbante në lojë skuadrën e tij. Vërtet serbi Kolarov e dënon me një penallti të goditur në mënyrë perfekte, të fituar pas prekjes me dorë të Milinkoviç-Saviçit në zonë, por “gardiani” i Kombëtares kuqezi ka meritën që në minutën e parë shtesë të pjesës së parë devijon me saktësi kirurgjikale në goditje këndi një goditje dënimi të frikshme, sërish të Kolarovit, e cila e mbyll gjithashtu në barazim 1-1 përballjen direkte mes shqiptarit dhe serbit.
Si rrallëherë, në fund të sfidës u pa edhe një atmosferë shumë e qetë mes dy tifozërive, të cilat fillimisht duartrokitën ndarjen nga jeta të ish-kapoultrasit të bardhekaltërve, “Diabolik”, i përshëndetur me duartrokitje nga të dyja tribunat, por edhe në fund të sfidës, të dyja tifozëritë duartrokitën skuadrat në fushë.
Thomas Strakosha do ta mbajë mend mirë këtë derbi të 173-të të kryeqytetit (duke llogaritur sfida në kampionat dhe Kupën e Italisë), sepse përveç saktësisë me të cilën shmangu golin e mundshëm të 2-0 të Kolarovit, e pa veten shumë me fat edhe nga dy shtyllat e shkundura nga Zaniolo, dy raste shumë të pastra për gol, që talenti i verdhekuqve mund t’i kishte shfrytëzuar më mirë.
NOTA- I saktë ndaj Aleksandër Kolarovit, por edhe me fat pas dy shtyllave të talentit të Romës, Nikolo Zaniolo, prandaj media italiane në kor e vlerësoi me notën 6 paraqitjen e gardianit shqiptar, Thomas Strakosha: “Te penalltia Kolarov e çmonton totalisht, ndërsa shtyllat e shpëtojnë. Pjesa tjetër e ndeshjes ishte administrim normal për Thomasin, ndonëse pritja e tij në sekondat finale të pjesës së parë, ndaj Kolarovit vlen jo pak”. /panorama
