Studentët e ngujuar në Fakultetin Ekonomik, kanë rikonfirmuar se nuk do të ndalen në protestën e tyre. Në një prononcim për mediat, studentët i mëshuan faktit se do të vazhdojnë protestën e tyre, pavarësisht sulmeve që iu bëhen.
Deklarata e lexuar nga një vajzë, nisi me shprehjen :“Nëse mendoni që jemi partiakë, në djall vafshi!”.
“Gjithmonë kemi besuar për lirinë e mendimit, dhe një të ardhme më të mirë, tha studentja. Jemi bërë popull pa shtyllë kurrizore në mendim, me mungesë ndërgjegje në llumin e të pamoralshmes.
Pas një muaji, janari duhet të na gjente më me dinjitet. Ambientet tona nuk janë në gjendje funksionale, janë ende të ftohta. E vetmja gjë që kemi, është infrastrukura e mendimit idealist.
Qëllimi ynë nuk ishte rrëzimi i partive, as i qeverive. Kemi dëgjuar lloj-lloj sulmesh. Ne ju themi: Në shkollë kemi prezencën idealiste të shumicës. Ju lutem, mjaft na përbaltët, sepse dielli i shpresës do të shkelqejë. Të gjithë duam arsim. Nëse shihni atë që ne shohim, nëse ndieni atë që ne ndiejmë, le të qëndrojmë të bashkuar!”.
