Për mamatë tona mund të flasim gjithë ditën. Pa to e kemi të pamundur të jetojmë, por duhet pranuar se kanë disa “zakone të çuditshme” të cilat çmendin çdo vajzë.
Megjithatë, këto zakone janë të të gjitha nënave. Jeni kurioze për çfarë bëhet fjalë?
1- Sa herë zihesh me të dashurin e ke ti fajin!
Edhe pse ti nuk është se ke ndërmend t’i thuash mamit që je zënë me të dashurin, ajo do e kuptojë menjëherë për shkak të sjelljes tënde dhe do të thotë: “Me siguri e kishe ti fajin që jeni zënë. Të njoh unë ty!”
Në fakt vetëm këtë kishe mangut, por i thua një “boll të lutem!” dhe gjen mënyrën për t’u larguar.
2-Do ta gdhish me gocat, por telefoni është makthi yt!
Edhe pse ia ke bërë të qartë ditë më parë se këtë fundjavë do dalësh me shoqet për të pirë një gotë, stresi fillon sapo ti del nga shtëpia me telefonatat nga mamaja. Herën e parë i përgjigjesh thirrjes së saj për ta qetësuar se gjithçka është mirë dhe thjesht kam dalë për qejf! Por jo, telefonatat shpeshtohen me kalimin e kohës derisa ti pendohesh që dole.
3- Punët e shtëpisë
Nënat tona kanë gjithashtu aftësinë magjike të ta kthejnë fundjavën në një ditë tmerri. Është mëngjesi i të shtunës dhe zgjohesh me një buzëqeshje që vjen sepse je pushim. Por jo, ndërkohë që ti po mendon për vaktin e bollshëm që do konsumosh me terezi, dëgjon një ulërimë nga dhoma tjetër. “Vetëm unë bëj punë në këtë shtëpi! As dhomën tënde nuk pastron dot!”
E pasi ka mbaruar me ritualin, nis mendimet e saj aspak optimiste për të ardhmen tënde. Sipas saj, ti një ditë do të shkosh tek burri dhe s’do dish si mbahet një shtëpi dhe gjithë kjo barrë e rëndë turpi bie pikërisht mbi mamin!
Por kujt i duhet nëse di të bësh punë shtëpie apo jo? Sigurisht, kjo lidhet me mënyrën se si organizon kohën dhe gjërat e tua, por argumenti i mamave është pak anakronik. Ndoshta harrojnë që zyra është shtëpia e re!
4- S’guxon të ankohesh!
Ndoshta ke dhimbje barku apo s’ndihesh mirë dhe e vetmja që mund të të kuptojë dhe shërojë është mami. Por, të gjithë e kemi provuar atë ndjesinë e tmerrshme që të shkakton përgjigja e saj kur i thua seç kam një dhimbje këtu.
“Të rrish gjithë ditën në telefon, normale që do ta kesh!” Ok, s’kanë asnjë pikë bashkimi me njëra-tjetrën por mami është mami dhe studimet e fundit ashtu i kanë rezultuar. Sa bukur dukesh kur nuk ankohesh apo jo?
5- Kur jeni duke bërë pazar jashtë vendit
Para se të dilni ajo e ka ndarë mendjen që do blej një gjë të mirë për vete dhe pikë, se boll mendon për pjesëtarët e tjerë të familjes. Po mirë, gjithçka është në rregull derisa orët kalojnë dhe pasi sheh çmimin e çdo ‘gjëje të mirë’, fillon të tregon gjithçka që do të bënte me ato para. Sigurisht, në fund të ditës nuk e bleu kurrë atë që tha, por sapo gjen vërtetë atë që kishte në mendje, i rikthehet buzëqeshja se kurseu plot krenari ca të holla!
