Duket se interesimi i treguar nga biznesmeni Pëllumb Salillari për të privatizuar ekipin e Tomorrit është serioz. Pak ditë më parë ai kishte depozituar dokumentacionin përkatës në bashkinë Berat, për tu futur në garë për privatizimin e klubit dhe ngritjen e tij në nivele të larta. Pika më e fortë ishte investimi i 5 milionë eurove për një impiant modern dhe krijimin e një infrastrukture model.
Por duket se biznesmeni i njohur ka edhe disa kushte për të kryer këto investime. Ai ka kërkuar që privatizimi të jetë i plotë dhe të përfshijë gjithë pronat e klubit. “As më pak dhe as më shumë, që duhen bërë publike pronat e klubit dhe cilat janë këto asete që përfshihen në privatizimin e klubit. Qëndrimi im për këtë rast në rast se doni të dini dhe informoni opinionin futbolldashës beratas, është se po nuk u përfshi fusha e vjetër në privatizim, unë nuk mund të futem në këtë proces. Por, në projektin tim dhe të çdo biznesmeni tjetër kandidat për privatizimin e klubit, gjithë problemi është që me një stadium me përmasa olimpike që unë do ta bëj një nga më modernët në Shqipëri, kurrsesi s’mund të ketë funksionin e një fushe stërvitore si deri më tani.
Fusha e vjetër që do të ketë një investim model, do të shërbejë për stërvitjen e Tomorit, dhe bëhet fjalë për Tomorin që nën drejtimin tim do të jetë një tjetër funksioni sepse do të synoj çdo sezon Kupat e Evropës. Unë dëgjoj të flitet për kthimin e stadiumit të vjetër në një qendër multifunksionale rinore, por unë me shumë dashamirësi do t’i sugjeroja Bashkisë, që ky projekt mund të ndërtohet kudo, por nuk duhet të ngrihet mbi një fushë futbolli. Unë nuk mund t’i futem kësaj pune pa pasur fushën e ish-stadiumit të vjetër të kopsitur në procesin e privatizimit. Fusha është aset i klubit”, u shpreh Salillari për “Sport Ekspres”.
“Trajner të huaj dhe Akademi futbolli për beratasit”
“Është kryekëput një naivitet të mendohet kështu, dhe kjo për sa kohë që në projektin tim është drejtimi i skuadrës nga një grup profesionistësh të njohur. Pse jo, në krye të tyre të ketë edhe një trajner të huaj. Kjo me siguri që e “kanalizon” punën mbi baza krejt profesioniste dhe skuadrën e ngre në një nivel bashkëkohor. Kjo besoj duhet të kënaq të gjithë pa përjashtim që Tomori ynë do të jetë më pranë futbollit të vërtetë profesionist.
Në këtë kuadër, mund të them me siguri dhe garanci të plotë, se çdo futbollist aktual beratas ose jo i tillë, po qe se do të jetë më pranë kërkesave të futbollit profesionist dhe niveli i tij bind stafin, as që bëhet fjalë që të përçmohet. Sepse ne kërkojmë funksionimin e një skuadre ku i talentuari të jetë pjesë e Tomorit dhe të paaftët të hapin krahun sipas kërkesave të stafit teknik. Ndërsa për perspektivën e të ardhmen e futbollit beratas, në planet e mia është ndërtimi i një Akademie futbolli, ku në të cilën do të punojnë trajnerët më të mirë profesionistë beratas dhe jo të tillë,” shtoi Pëllumb Salillari.
