Liz Truss dha dorëheqjen sot, duke pranuar humbjen pas bisedimeve të krizës në Downing Street me shefat konservatorë.
Pas vetëm 44 ditësh, kryeministrja shkoi në një foltore për të konfirmuar largimin e saj, duke vulosur fatin e saj si kryeministrja më e jetëshkurtër në historinë moderne politike.
Duke zbuluar se kishte informuar Mbretin për vendimin e saj, ajo tha: “Unë nuk mund ta mbaj mandatin… Do të qëndroj si kryeministre derisa të zgjidhet një pasardhës”.
Truss do të jetë kryeministrja me mandatin më të shkurtër në historinë e Mbretërisë së Bashkuar.
Ajo ka qenë nën presionin e deputetëve konservatorë për të dhënë dorëheqjen, pas dorëheqjes së Suella Braverman si sekretare e Brendshme dhe pas krizës që pësoi qeveria e saj.
Gjashtë javë pasi u bë kryeministre e Britanisë, Truss është hasur me probleme të shumta, me opinionin publik dhe deputetët e partisë së saj të cilët ishin në pikëpytje për qeverisjen e saj.
Përpara gazetarëve, Truss është shprehur se ajo erdhi në pushtet në një periudhë “paqëndrueshmërie të madhe ekonomike dhe ndërkombëtare”. Vendi ishte frenuar prej kohësh dhe ajo u zgjodh nga partia e saj në “një mandat për ta ndryshuar këtë”.
Truss tha se qeveria e saj ia doli me faturat e energjisë dhe shkurtimin e sigurimeve kombëtare si dhe vendosi një vizion për “ekonominë e taksave të ulëta, rritjes së lartë”. “Unë kuptoj… varësisht situatës se nuk mund ta përfundoj mandatin në të cilin u përzgjodha nga Partia Konservatore”, shtoi Truss.
Ajo tha se sot u takua me drejtuesin e Komitetit të vitit 1922, Sir Graham Brady. Në këtë takim, ata ranë dakord se gjatë javës së ardhshme do të ketë zgjedhje të reja për drejtimin e vendit. Ajo thotë se kjo do të sigurojë që vendi të mbetet në rrugën “për të zbatuar planet fiskale dhe ruajtjen e qëndrueshmërisë ekonomike dhe sigurisë kombëtare të vendit”. Truss do të mbajë detyrën si kryeministre derisa të zgjidhet pasuesi i saj.
